Grezda shpreson t’i shënojë bashkëlojtarit të tij në Shkodër

Eros Grezda do të jetë përballë bashkëlojtarit të tij në ndeshjen Shqipëri-Skoci më 17 nëntor në Shkodër

Anësori Eros Grezda po ka gjithnjë e më shumë minuta te Rangers. Ai së fundi ishte edhe në konferencë për media për ndeshjen e radhës, së bashku me trajnerin e tij, Steven Gerrard.

Skuadra e tij në fundjavë do të ndeshet me Motherwell dhe me tri pikë do t’i afrohej edhe më shumë kreut, përcjell albinfo.ch.

“Është një mundësi e mirë për mua pasi edhe shokët kanë qenë të pafat me dëmtimet. Është një ndeshje e madhe e rëndësishme për mua dhe skuadrën. Kam pritur për mundësitë e mia dhe tani do t’i shfrytëzoj”, është shprehur Grezda.

Shqipëria e pret Skocinë më 17 nëntor në Ligën e Kombeve në ndeshjen vendimtare për kuqezinjtë.

“Për të qenë i ndershëm, para se të vija te Rangers nuk dija shumë për kampionatin skocez dhe kombëtaren, por tashmë e kam një vizion për këtë Ligë. Do të luajmë një ndeshje të madhe me Skocinë më 17 nëntor në Shqipëri. Do të kërkojmë patjetër fitoren, për të qëndruar në grupin C në Ligën e Kombeve. Por kemi një ndeshje tjetër dielën këtu në kampionat, kështu që le ta kemi vëmendjen te kjo ndeshje”, theksoi tutje mesfushori nga Gjakova.

Madje, përballë tij do ta ketë portierin e Rangers më 17 nëntor në “Loro Boriçi” të Shkodrës.

“I kam thënë që do i shënojë, shpresoj që të ndodhë kështu”.

---