Halloween në Zvicër kalon me incidente të vogla

Keystone

Festa „Halloween“ që u shënua natën e mbrëmshme nuk ka sjellë vetëm gëzim e hare. Për shumëkë ajo ka qenë edhe natë e mundimshme. Sidomos për policinë. Vetëm në Kantonin e Cyrihut, policëve u është dashur të ndërhynin plot 130 herë për të qetësuar festuesit e zhurmshëm dhe nganjëherë edhe problematikë.

Ndonëse nuk ka pasur ndonjë incident të rëndë, nuk kanë munguar dëmet materiale.

Siç bën të ditur Policia e Kantonit të Cyrihut, në disa raste janë hedhur vezë në muret e shtëpive. Pastaj ka pasur raste kur fëmijët u janë kanosur moshtarëve të tyre për që t`ua japin ëmbëlsirat.

Policia ka raportuar po ashtu për hedhje të gjësendve të ndryshme në rrugë nga persona të papërgjegjshëm. Në njërin nga këto raste është hedhur një objekt në një kthesë të rrugës. Vetëm frenimi i plotë dhe i shpejtë që ka bërë ngasësi i veturës ka evituar aksidentin.