Hamza me “ofertën e fundit” Kurtit: Presidenti të zgjidhet nga PDK-ja

Foto FB: Bedri Hamza

Kryetari i Partisë Demokratike të Kosovës, Bedri Hamza, ka njoftuar se i ka ofruar kryeministrit të Kosovës dhe kryetarit të Lëvizjes Vetëvendosje, Albin Kurti, një marrëveshje sipas së cilës presidenti i vendit do të zgjidhej nga një propozim i subjektit që ai drejton.

Në konferencën për media pas takimit me Kurtin, Hamza ka thënë se kjo është oferta e fundit zyrtare e partisë së tij për të shmangur zgjedhjet dhe për të zhbllokuar situatën politike ndërsa u shpreh se tani pret një sinjal nga Lëvizja Vetëvendosje lidhur me këtë propozim, transmeton albinfo.ch.

“Sot, në takimin e dytë me Kurtin, PDK-ja ofroi edhe një mundësi konkrete dhe të fundit për të shmangur zgjedhjet, duke propozuar zgjedhjen e një presidenti nga radhët tona, me qëllim garantimin e stabilitetit institucional dhe tejkalimin e ngërçit politik. Kryesia e PDK-së vlerëson se kontributi ynë në këtë proces është përmbushur”, tha ai.

Hamza deklaroi se kërkesa fillestare ka qenë që kandidatura të vinte nga familja Jashari, por se familja ka dalë zyrtarisht kundër përfshirjes në proces politik.

Tutje, ai tha se përgjegjësia bie mbi shumicën parlamentare.

“Nuk mund dhe nuk do të marrim përgjegjësinë që nuk na takon. Nuk mund ta zëvendësojmë shumicën parlamentare. Jemi opozitë, do të sillemi si të tillë. Nuk jemi pengesë e proceseve shtetërore. Opozita ka rol kontrollues, jo rol shpëtues. Kosova ka nevojë për president, për institucione konsensuale, ka nevojë për shumicë parlamentare që mban përgjegjësi dhe larg lojërave politike. Nga sot, përgjegjësia është e atyre që qeverisin”, u shpreh ai.

Bedri Hamza njoftoi se në takimin e sotëm nuk është diskutuar asnjë emër konkret, pasi palët nuk kanë arritur deri në atë fazë të bisedimeve.