Hamza takon udhëheqësin e ri të diplomacisë amerikane në Ballkan, Alexander Kasanof

Bedri Hamza në State Department pritet nga Alexander Kasanof: Do t’i revidojmë gabimet dhe konfuzionin politik të qeverisjes në Kosovë

Kryetari i Komunës së Mitrovicës, njëherësh kandidat për kryeministër nga PDK, Bedri Hamza, gjatë qëndrimit të tij në Shtetet e Bashkuara të Amerikës (SHBA) ka zhvilluar një sërë takimesh.

Hamza përmes një postimi në rrjetin social në Facebook ka treguar se ka zhvilluar një takim në State Department me udhëheqësin e ri të diplomacisë amerikane në Ballkan. Alexander Kasanof.

Pas takimit, Hamza ka deklaruar se është më i bindur se kurrë se në Amerikë i kemi shtyllat kryesore të përkrahjes dhe mbrojtjes, duke shtuar se “konfuzioni politik i qeverisjes në Kosovë dhe gabimet e njëpasnjëshme medoemos do të revidohen”.

“Takimin e përfundova me optimizëm që konfuzioni politik i qeverisjes në Kosovë dhe gabimet e njëpasnjëshme medoemos do të revidohen, që të fokusohemi në rezultatet konkrete për qytetarët tanë dhe jo në krijim të dramave që nuk sjellin asgjë, pos izolim dhe injorim”, ka shkruar Hamza.

Alexander Kasanof ka marrë detyrën e zëvendësndihmës sekretarit për Ballkanin Perëndimor në korrik të këtij viti.

Këtë post paraprakisht e kishte mbajtur Gabriel Escobar, mandati i të cilit përfundoi në maj të këtij viti.

 

---