Hapen pikëkalimet kufitare në veri

Ministri i Brendshëm i Kosovës, Xhelal Sveçla, njofton se barrikadat e vendosura nga strukturat ilegale serbe mbrëmë, 15 minuta pas lëshimit të sistemit të alarmit dhe të shpërndara në 9 lokacione të ndryshme në veriun e vendit, tashmë janë larguar plotësisht nga vetë ata. Liria e lëvizjes është e plotë dhe pikat kufitare Jarinje dhe Bërnjak janë të hapura për qytetarët.

Ai po ashtu thekson se përveç sulmeve ndaj qytetarëve, dëmeve materiale e tentim vrasjeve ndaj zyrtarëve policorë, janë ballafaquar mbrëmë edhe me sulme kibernetike, të cilat kanë tentuar të pengojnë funksionimin shtetëror. Në këtë drejtim, Sveçla thotë se kanë marrë të gjitha masat e nevojshme dhe sistemi është mbrojtur suksesshëm.