Haradinaj arsyeton numrin e madh të zv. ministrave

Kryeministri i Kosovës, Ramush Haradinaj ka kërkuar nga ministrat e tij që t’u gjejnë më shumë punë zëvendësve të tyre. Në mbledhjen e Qeverisë, Haradinaj i ka informuar ministrat e tij në lidhje me raportin e punës dhe takimin që ka pasur me zëvendësministrat.

“Kam mbajtur një takim me zëvendësministrat. Shumica kanë dëshmuar një shkallë të seriozitetit në punë. Janë raporte të aktiviteteve të tyre. Kam kërkuar që në të ardhmen të maten efektet. Një lutje e kam për ministrat; të koordinoheni me ta më shumë për punët javore. Është praktikë e mirë, sepse mund të nxjerrim më shumë efekte të mira. Edhe pse është një numër i tillë çfarë është, e që është 74, arsyeshmëria mund të argumentohet nëse atyre u nxjerrim punë. Ju kisha lutur, jepuni punë”, u ka thënë Haradinaj ministrave, përcjell albinfo.ch.

Ndërsa ministri i Zhvillimit Ekonomik, Valdrin Lluka, ka prezantuar detaje rreth themelimit të Ndërmarrjes së Re Energjetike të Kosovës. Lluka tha se kjo ndërmarrje do të jetë nënshkruese e marrëveshjes për blerjen e energjisë, ndërsa ftoi ministrat përgjegjës që të marrin pjesë në mbledhjen që do të mbahet të premten, në të cilën do të diskutohet për këtë çështje.