Haradinaj : Të vendosur për parandalimin e çdo ideologjie ekstremiste

“Qytetarët e Kosovës, ata që jetojnë këtu dhe që i rrisin fëmijët këtu, nuk duan dhe nuk lejojnë që fëmija e tyre të rrezikohet prej akteve terroriste"

Kryeministri, Ramush Haradinaj në tryezën e organizuar nga Ministria e Punëve të Brendshme, të titulluar “Luftimi i ekstremizmit të dhunshëm dhe radikalizmit që shpie në terrorizëm”, ka theksuar rëndësinë e përmbylljes së kornizës së institucioneve të sigurisë në vend si dhe dhënien e fuqisë për këto institucione, bazuar në mandatin ligjor që e kanë.

Përveç ngritjes së kapaciteteve institucionale, kryeministri theksoi se edhe arsimimi më i mirë jep më pak mundësi që qytetarët e Kosovës të rrezikojnë popujt tjerë apo të bëhen bartës të veprimtarive të tilla.

“Qytetarët e Kosovës, ata që jetojnë këtu dhe që i rrisin fëmijët këtu, nuk duan dhe nuk lejojnë që fëmija e tyre të rrezikohet prej akteve terroriste, si i shohim në media, kur fëmijët në festa ose gjatë lojës ose kohës së lirë sulmohen. Nuk besoj që ka dikush  në Kosovë që ka dëshirë ta sheh këtë duke ndodhur këtu, edhe tek fëmijët e vet. Që mos të ndodh kjo, kushdo që është në mandat ligjor duhet ta dijë që ka përgjegjësi, edhe nuk ka hapësirë as për tolerancë, as për flirtim, as për mbyllje sysh, as për neglizhencë”, theksoi kryeministri.

Ministri i Punëve të Brendshme, Flamur Sefaj, theksoi se shpejt pritet që Strategjia Shtetërore Kundër Terrorizmit 2017 – 2022 t’i dorëzohet për miratim Qeverisë së Republikës së Kosovës, ndërsa do të bëhet edhe vlerësimi vjetor i implementimit të Strategjisë për Parandalimin e Ekstremizmit të Dhunshëm dhe Radikalizmit që shpie në Terrorizëm 2015 – 2020.

Në këtë tryezë kanë marrë pjesë edhe ministra të linjës së Qeverisë së Kosovës, Ambasadorët e vendeve të QUINT-it në Kosovë dhe akterë tjerë kyç që merren me luftimin e terrorizmit dhe ekstremizmit të dhunshëm në Republikën e Kosovës.