Haziri sqaron deklaratat: Vjosa Osmani mbetet kandidatja e vetme e LDK-së për presidente

Foto: Facebook

Nënkryetari i Lidhjes Demokratike të Kosovës (LDK), Lutfi Haziri, ka sqaruar publikisht deklaratat e tij të fundit lidhur me çështjen e presidentit të vendit, duke theksuar se qëndrimi zyrtar i partisë mbetet i pandryshuar, përcjell albinfo.ch.

Përmes një reagimi, Haziri bëri të ditur se Vjosa Osmani vazhdon të jetë emri i vetëm i nominuar nga LDK-ja për postin e presidentes së Kosovës.

Ai tha se në debatet paszgjedhore ka paraqitur vetëm parime dhe modalitete të mundshme për bashkëpunim politik, me synimin e krijimit të stabilitetit institucional dhe politik në vend, pa cenuar qëndrimet zyrtare të partisë.

Haziri nënvizoi se kryetari i LDK-së, Lumir Abdixhiku, mbetet adresa e vetme për zhvillimin e proceseve politike në periudhën e ardhshme dhe se çdo iniciativë apo kërkesë politike do të shqyrtohet përmes strukturave legjitime të partisë.

Në fund të reagimit, ai theksoi rëndësinë e demokracisë, lirisë dhe pavarësisë së Kosovës, duke kundërshtuar konceptin e “një partie, një shteti”.

“Askush mbi Republikën”, ka përfunduar Haziri në mesazhin e tij. /Albinfo.ch