Hiqen paralajmërimet për vapën në pothuajse të gjithë Zvicrën

Pas 12 ditësh temperaturash ekstreme, moti freskohet në shumicën e rajoneve, ndërsa në jug të Alpeve vala e të nxehtit vazhdon

Paralajmërimet për valën e të nxehtit janë hequr në pothuajse të gjitha rajonet e Zvicrës, pasi periudha 12-ditore e temperaturave ekstreme ka përfunduar në pjesën veriore të Alpeve dhe në kantonin Valais, njoftoi MeteoSwiss, transmeton albinfo.ch.

Sipas shërbimit meteorologjik zviceran, gjatë ditëve në vijim temperaturat në këto rajone do të lëvizin nga 26 deri në 31 gradë Celsius, dukshëm më të ulëta krahasuar me javën e kaluar, kur në shumë zona u regjistruan temperatura deri në 38 gradë.

Megjithatë, vala e të nxehtit vazhdon ende në jug të Alpeve, ku pritet të zgjasë deri të premten.

Meteorologët paralajmërojnë se freskimi mund të jetë vetëm i përkohshëm, pasi moti shumë i nxehtë mund të rikthehet sërish që javën e ardhshme./Albinfo.ch

---