I masakrohen 60 pëllumba një shqiptari nga Berna

Fjala është për pëllumbat e Jetmir Halimit, i njohur si amator i pasionuar i kultivimit të këtyre shpendëve

Ditë më parë, një kultivuesi shqiptar pëllumbash në Münchenbuchse të Bernës i janë vrarë gjashtëdhjetë pëllumba në kotecin ku i mbante. Fjala është për pëllumbat shqiptarë të Jetmir Halimit, i njohur si amator i pasionuar i kultivimit të këtyre shpendëve.

Me atë rast, siç njofton rashit Rushiti, sekretar i Shoqatës së kultivuesve të pëllumbave shqiptarë “Dardania” të Zvicrës, në vendin e ngjarjes kishin dalë edhe policia vendore dhe përfaqësuesit e Tierschutz (Organizata për mbrojtjen e kafshëve). Këta të fundit kanë shprehur tronditjen e tyre me masakrën e bërë nga kriminelët e panjohur.

Jetmir Halimi, i tronditur dhe i mllefosur me ngjarjen, ka vendosur të heqë dorë nga kultivimi i mëtejmë i pëllumbave në Zvicër.

Ndërkaq, shoqata “Dardania” kërkon nga organet hetuese vendore që “të bëhen hetime të plota dhe këta kriminelë të këtij akti makabër të përgjigjen para gjyqit dhe drejtësisë zvicerane, ku ndodhi kjo masakër ndaj këtyre shpezëve tejet fisnike”.