I mori fëmijët dhe iku në Francë, 30-vjeçarja nga Kosova përfundon nën hetim

U largua në Francë me fëmijët pa autorizim, 30-vjeçarja përballet me hetime

Një rast i dyshuar i marrjes së kundërligjshme të fëmijëve është duke u hetuar nga Policia e Kosovës, pasi një 36-vjeçar nga Malisheva ka raportuar se ish-bashkëshortja e tij është larguar me fëmijët në Francë pa pëlqimin e tij, transmeton albinfo.ch.

Sipas denoncimit, çifti ndodhet në proces ndarjeje, ndërsa burri pretendon se ish-bashkëshortja ka marrë fëmijët dhe është larguar jashtë vendit pa autorizimin e tij. Ai ka deklaruar se, që nga largimi i tyre, nuk ka pasur asnjë kontakt me fëmijët dhe ka kërkuar ndërhyrjen e institucioneve kompetente.

Me urdhër të prokurorit kujdestar, rasti është iniciuar për veprën penale “Marrja apo mbajtja e kundërligjshme e fëmijës”, ndërsa hetimet janë në vazhdim për zbardhjen e plotë të rrethanave.

Autoritetet nuk kanë bërë të ditur detaje të tjera lidhur me rastin, ndërsa procedurat ligjore pritet të vazhdojnë në përputhje me hetimet.

Shënim: Personi i përmendur në këtë rast prezumohet i pafajshëm derisa fajësia e tij të provohet me vendim të formës së prerë të gjykatës. /Albinfo.ch

---