Infektologu Dedushaj: Mund të shtohet numri i të vdekurve në Kosovë

(AP Photo/Jessica Hill)

Ministria e Shëndetësisë ka njoftuar se sot kanë ndërruar jetë dy pacientë si pasojë e Covid 19, duke bërë që të arrijë në tre numri i të vdekurve në Kosovë.

Infektologu kosovar, Isuf Dedushaj, ka thënë që shpreh keqardhje për familjarët që kanë humbur të afërmit nga koronavirusi.

Dedushaj në një prononcim për media kosovare ka paralajmëruar se pritet të ketë akoma të vdekur si pasojë e pandemisë në Kosovë.

“Shpreh keqardhje dhe ngushëllimet e mia familjarëve që i kanë humbur të afërmit. Pritet të ketë akoma të vdekur. Ka shkallë relativisht të lartë të vdekshmërisë sidomos te personat e moshuar. Në Itali edhe në vendet e tjera kanë vdekur njerëz të moshës më të re, por që kanë pasur edhe ndonjë sëmundje tjetër”.

“Një javë ose 10 ditë para se të paraqitet rasti i parë në Kosovë është marrë qëndrim të mbyllen shkollat. 50 % e popullsisë janë në izolim. E vetmja metodë e suksesshme në Kosovë ka qenë ndalja e shkollave dhe tubimeve masive. Edhe prijësit fetarë i janë përgjigjur thirrjes që t’i ikin ceremonive fetare”.

Dedushaj ka theksuar se Kosova ka një përvojë të hidhur me sëmundjet ngjitëse.

“Ajo që më ka lënë përshtypje është angazhimi i stafit mjekësor, të cilët kanë punuar në mënyrë të jashtëzakonshme dhe i kanë zbatuar me përpikëri masat e marra nga Qeveria kundër përhapjes së pandemisë”.