Iniciativë kundër të drejtës së vetos të Shtëpisë Princërore

Por, princërit e Lihtenshtajnit kanë deklartuar se nuk e kanë ndërmend të heqin dorë nga e drejta e vetos

Qeveria e Principatës së Lihtenshtajnit ka miratuar të martën një iniciativë popullore që synon kufizimin e të drejtës së vetos për shtëpinë princëror. Por, para se bartësit e iniciativës të fillojnë grumbullimin e nënshkrimeve, ajo duhet t`i nënshtrohet procedurës provuese të parlamentit.

Që iniciativa të jetë e plotfuqishme nevojitet grumbullimi i 1500 nënshkrimeve brenda një afati prej 6 javësh.

Iniciativa me sloganin “Po – në mënyrë që edhe vota jote të llogaritet” synon që në votimet popullore të jetë populli ai që thotë fjalën e fundit. Vendimet që merren në kutitë e votimit nuk do të duhej të anuloheshin nga princërit ose zëvendësit e tyre përmes vetos ose të ashtuquajturës “të drejtë të sanksionit”. Kushtetuta parasheh që çdo ligj i ri ose i ndryshuar, për të hyrë në fuqi, duhet të ketë miratimin e Shtëpisë Princërore. Po kjo vlen edhe për ndryshimin e kushtetutës, shkruan swissinfo.ch.

Vitin e kaluar, kishte lindur një konflikt në këtë kontekst lidhur me çështjen e legalizimit të të drejtës për ndërprerje të shtatzënisë. Princi Trashëgimtar i Lihtenshtajnit, Alois, qysh para fillimit të votimeve kishte deklaruar se nuk do ta nënshkruante ndryshimin e ligjit, edhe në rast se iniciativa do të fitonte shumicën.

Po kështu, princërit kanë reaguar edhe ndaj iniciativës së re. Nga Shtëpia Princërore në Vaduz është komunikuar se kërkesat e iniciatorëve do të përmbusheshin vetëm në rast se ata do të ishin për abrogimin e monarkisë. Ndryshe, princërit nuk e kanë ndërmend të heqin dorë nga e drejta e vetos.