ISIS kërcënon ndeshjen Real Madrid – Manchester City

Shteti Islamik ka kërcënuar sigurinë sa i përket ndeshjes çerekfinale të Ligës së Kampionëve mes Real Madridit dhe Machester Cityt këtë të martë.

Policia e Spanjës ka aktivizuar të gjitha sistemet e alarmit, pasi Shteti Islamik ka kërcënuar me sulme në stadiumet me kapacitete të mëdha. Këtu përfshihet edhe Santiago Bernabeu i rinovuar që ka kapacitet prej më shumë se 80 mijë spektatorësh.

Siç ka shkruar “The Sun”, më shumë se 170 roje sigurie pritet të shpërndahen në kryeqytetin spanjoll si pjesë e masave të sigurisë pas kërcënimit.

Katër ndeshje pritet të luhen të martën e të mërkurën këtë javë.

“Sa i përket parandalimit të kërcënimit terrorist, Forcat e Sigurisë kanë aktivizuar të gjitha sistemet e alarmit dhe mbrojtjes, si dhe mekanizmat e gatishmërisë”, ka thënë Fernando Grand-Marlaska, ministër i Brendshëm i Spanjës.

Alarmet nga ISIS-i janë shtuar pasi grupi mori përgjegjësinë për vrasjen e më shumë se 140 personave në një sulm terrorist në Moskë muajin e shkuar./The Sun