Itali: Shqiptari rrëmben bashkatdhetaren dhe djalin e saj të mitur

Shqiptari rrëmben 26 vjeçaren dhe djalin e saj në Itali, i lidh në makinë dhe tenton të largohet

Një shqiptar ka rënë në prangat e policisë italiane për rrëmbimin e një 26-vjeçareje dhe djalit të saj 5-vjeçar. Ndërhyrja e policisë erdhi pas alarmit të ngritur nga bashkëshorti i 26-vjeçares.

Mediat italiane raportojnë se 33-vjeçari kishte përndjekur 26-vjeçaren shqiptare, e cila po dërgonte fëmijën e saj të mitur në kopsht.

Shqiptari e ka detyruar bashkatdhetaren e tij që të ndalojë makinën dhe më pas e ka drejtuar vetë mjetin. Më pas iu ka vendosur nënës dhe djalit të saj lidhëse plastike rreth kyçeve të këmbës. Ishte bashkëshorti i shqiptares ai që dha alarmin në polici, pasi kjo e fundit u vonua për t’u kthyer në shtëpi.

Pasi lokalizoi mjetin, Policia iu vendos në ndjekje për gati njëqind kilometra deri në Grigno (Trento) makinës që drejtohej nga shqiptari. Ky i fundit u arrestua, ndërsa nuk dihen motivet që kanë çuar atë që të kryejë këtë akt të rëndë.

 

---