Jep dorëheqje “shefi më i shpejtë” i policisë në Zvicër

Ai që ishte dashur të ndiqte ngasësit e shpejtë të veturave ka ngarë vetë makinën e tij më shpejtë se sa lejohet!

Shefi i deritashëm i Policisë Kantonale të Aargaut, Stephan Reinhardt, pas katër vitesh në këtë pozitë, ka ofruar dorëheqjen. Kësaj dorëheqjeje i paraprin një histori me delikte të tij në trafik.

Ai që ishte dashur të ndiqte të rinjtë të cilët e ngasin veturën me shpejtësi të palejuar, ka bërë pikërisht këtë gjë: ka ngarë makinën e tij më shpejtë se sa lejojnë rregullat.

Fjala është për tashmë ish shefin e policisë Kantonale të Aargaut, Stephan Reinhardt. Në vitin 2011 ai qe fotografuar nga radarët duke ia “shkelur” me veturën e tij private përtej shpejtësisë së lejuar. Dhe, siç është parë më vonë, kjo nuk ka qenë hera e parë që ai ka rënë në konflikt me ligjin në komunikacion.

Kjo histori deliktesh ka bërë që Reinhardt, siç ka thënë në tekstin e dorëheqjes “të reflektojë se ai si polici numër një në kanton, nuk dëshiron që rolin e tij si shembull për të tjerët, ta komprometojë me deliktin e kryer”.

Mediet zvicerane kanë shkruar po kështu se Reinhardt, para shkeljes që ka bërë, ka qenë ndër më të zëshmit në polici për zero tolerancë ndaj “raserëve”, garuesve të shpejtësisë së veturave në rrugët automobilistike të Zvicrës.

Reinhardt do të ushtrojë funksionin e tij deri në fund të gushtit.