Kabineti gjerman miraton masa më të rrepta për azilin

@unsplash

Kabineti gjerman miratoi të mërkurën një paketë masash të reja për shtrëngimin e ligjeve të azilit, duke synuar lehtësimin e deportimeve dhe përshpejtimin e procedurave, në një përpjekje për të frenuar migracionin e parregullt, shkruan DW, transmeton albinfo.ch.

Masat përfshijnë një plan për ta bërë më të lehtë përcaktimin e “vendeve të sigurta të origjinës”, duke shmangur miratimin nga dhoma e sipërme e parlamentit, Bundesrat. Kjo nismë, e mbështetur nga ministri i Brendshëm Alexander Dobrindt (CSU), do t’i lejonte qeverisë federale të vendosë vetë cilat vende konsiderohen të sigurta, një lëvizje që ul ndjeshëm mundësinë e mbrojtjes për shumë azilkërkues.

Sipas planit, azilkërkuesit nga vendet që shpallen “të sigurta” do të kthehen më shpejt në vendet e tyre, pa pasur mundësi të madhe për apelim. Në të njëjtën kohë, është hequr detyrimi për emërimin automatik të një avokati shtetëror për personat në paraburgim para deportimit, një masë që ishte futur më parë me kërkesë të Partisë së Gjelbër.

Ministri Dobrindt tha se këto masa janë pjesë e një transformimi të plotë të politikës së azilit në Gjermani, duke shtuar se qeveria do të veprojë “brenda kuadrit të ligjit evropian”, transmeton albinfo.ch.

Miratimi i reformave ndodh në një kohë kur kancelari Friedrich Merz (CDU) është zotuar të ndërmarrë hapa të ashpër kundër migracionit të paligjshëm, për të frenuar rritjen e partisë së ekstremit të djathtë AfD, e cila po fiton terren në sondazhe.

Megjithatë, reformat kanë ngjallur kritika të forta nga ekspertët ligjorë dhe organizatat për të drejtat e njeriut. Shoqata Gjermane e Avokatëve paralajmëroi se ndryshimet do të sjellin komplikime të panevojshme ligjore, duke e bërë sistemin më të ngadaltë në vend që ta thjeshtojë. Ndërkohë, organizata Pro Asyl i cilësoi këto masa si “jodemokratike dhe të diskutueshme nga pikëpamja kushtetuese”, duke theksuar se ato rrezikojnë të mohojnë mbrojtjen për individët që janë realisht në rrezik.

Paketa e miratuar nga kabineti do të kalojë tani për votim në Bundestag, dhoma e ulët e parlamentit gjerman, transmeton albinfo.ch.