Kamberi në takim me kongresistët amerikanë: Kërkohet barazi dhe respektim i të drejtave të shqiptarëve në Luginë

Deputeti shqiptar në Kuvendin e Serbisë ngriti shqetësimet për diskriminimin ndaj shqiptarëve në Preshevë, Bujanoc dhe Medvegjë

Deputeti i vetëm shqiptar në Kuvendin e Serbisë, Shaip Kamberi, së bashku me kryetarin e Këshillit Kombëtar Shqiptar, Enkel Rexhepi, kanë zhvilluar një takim me kongresistët amerikanë Keith Self dhe Suhas Subramanyam, ku është diskutuar për pozitën e shqiptarëve në Luginën e Preshevës, përcjell albinfo.ch.

Kamberi e cilësoi këtë takim si një moment me rëndësi të veçantë për shqiptarët e Luginës dhe për perspektivën demokratike të rajonit, duke theksuar se gjatë bisedimeve kanë ngritur shqetësimet për politikat diskriminuese dhe përjashtuese të Beogradit zyrtar ndaj shqiptarëve.

Sipas tij, Serbia vazhdon të kërkojë standarde të larta për serbët në Kosovë, ndërsa të njëjtat standarde nuk i zbaton për shqiptarët në Preshevë, Bujanoc dhe Medvegjë.

“Regjimi aktual në Beograd vazhdon t’i trajtojë shqiptarët si problem politik dhe jo si qytetarë të barabartë”, ka deklaruar Kamberi, duke kërkuar barazi reale, përfaqësim proporcional dhe respektim të marrëveshjeve të nënshkruara.

Ai ka vlerësuar gjithashtu iniciativën e kongresistit amerikan Keith Self për projektligjin HR 6411, i cili kërkon nga Departamenti Amerikan i Shtetit përgatitjen e një raporti zyrtar mbi trajtimin e shqiptarëve dhe pakicave të tjera etnike në Serbi, me fokus të veçantë në Luginën e Preshevës.

Kamberi paralajmëroi se heshtja ndaj padrejtësive në Luginë rrezikon të nxisë emigrimin, pasigurinë dhe destabilitetin afatgjatë në rajon. Ai theksoi se shqiptarët në Luginën e Preshevës mbeten të përkushtuar ndaj paqes, bashkëjetesës dhe orientimit euro-atlantik, por se pa barazi reale dhe zhvillim ekonomik, rreziku i zbrazjes demografike mbetet serioz. /Albinfo.ch

---