Edhe kancelari austriak, Nehammer, takohet me Zelenskin në Kiev

Kancelari i Austrisë Karl Nehammer takoi sot presidentin ukrainas Volodomir Zelenskin në Kiev. Nehmmar i premtoi atij mbështetje të vazhdueshme.

Pas një udhëtimi 14-orësh me avion dhe tren, delegacioni i kancelarit austriak, Karl Nehammer, arriti në Kiev të shtunën pasdite. Në një konferencë të përbashkët për shtyp me presidentin ukrainas, Volodomir Zelensky, premtoi sanksione të mëtejshme kundër Rusisë.

“Agresioni rus është i papranueshëm”

Gjatë konferencës për shtyp, Nehammer falënderoi presidentin ukrainas, i cili edhe në mes të luftës gjeti mundësi për takim. “Lufta e agresionit rus ishte plotësisht “e papranueshme”. “Austria është një vend neutral dhe pjesë e BE-së. Ushtarakisht neutrale, por jo neutrale kur bëhet fjalë për krime dhe për padrejtësi”, ka thënë ai, përcjell albinfo.at.

Austria do të mbështesë plotësisht sanksionet e BE-së. Sipas Nehammer, ai e di se asnjë sanksion nuk mjafton për një masakër si Butsha.

Ndalimi i importit të gazit mund të ketë pasoja të rënda ekonomike dhe rrjedhimisht sociale për Austrinë. Megjithatë, kancelari e bëri absolutisht të qartë: “Dhimbja që po vuan ekonomia austriake nga sanksionet shkojnë në miliarda, por asgjë nuk krahasohet me dhimbjen që po vuan aktualisht populli ukrainas”, tha ai, transmeton albinfo.at.

Në anën tjetër, duke pasur parasysh ofensivën e trupave ruse në lindje të Ukrainës, Zelenski gjatë këtij takimi ka thënë. “Do të jetë një luftë e vështirë, por ne besojmë në fitoren tonë”. Tutje ai ka falënderuar kancelarin austriak për vizitën në këtë kohë të vështirë dhe për mbështetjen që po i jep shtetit ukrainas.

---