Kantonet lindore për “shtyrjen” e mësimit të frëngjishtes

Mësimi i dy gjuhëve të huaja në ciklin e ulët është stërngarkesë për shumë nxënës të kësaj moshe

Nxënësit e kantoneve të Zvicrës lindore në të ardhmen mund të mos e mësojnë gjuhën frënge nga klasa e pestë, siç e bëjnë sot, por vetëm duke filluar nga cikli i lartë.

Kështu kanë propozuar drejtoritë kantonale të ciklit të mesëm, të kantoneve Cyrih, Turgau, St. Gallen, Appenzell Innerhoden dhe Glarus.

Praktika e deritashme ka treguar se mësimi i dy gjuhëve të huaja në ciklin e ulët është stërngarkesë për shumë nxënës të kësaj moshe, thuhet në letrën e këtyre drejtorive.

Madje, për fëmijët me prejardhje të huaj kjo nënkupton detyrimin për të mësuar tri gjuhë të huaja përnjëherësh.

Ky rekomandim ndërkaq, bie në kundërshtim me marrëveshjen Harmos, sipas të cilës nga klasa e pestë e fillores duhet mësuar gjuhën e dytë të huaj.