Kërcënim: Ekstremisti ofron para “për kokën e ministrit Berset”

"Unë do të krijoj një llogari donacionesh dhe çdo cent që depozitohet në të i përket kujtdo që e vret ose eliminon atë"

Një ekstremist i radhëve të mohuesve të koronavirusit, me inicialet I.G. ka bërë në facebook një apel për donacione për të vrarë ministrin e shëndetësisë, Alain Berset.

Ai thotë se do t`ia dërgojë paratë kujtdo që “rrëzon” ministrin federal në fjalë, shkruan 20minuten.ch.

“Unë do të krijoj një llogari donacionesh dhe çdo cent që depozitohet në të i përket kujtdo që e vret ose eliminon atë”.

” Është thënë ironikisht, por unë jam absolutisht serioz,” shton ai në fund të postimit.

Pak më vonë ai ka fshirë postimin, duket, i shtyrë nga reaksionet që ka ngjallur.

Kërcënimet ndaj politikanëve, të bëra kryesisht në rrjetet sociale, kanë marrë hov sidomos gjatë vitit të kaluar, shkruan albinfo.ch. Ministri Berset, si figura më e ekspozuar në lidhje me masat e pandemisë, ka qenë disa herë në shënjestër të sulmeve ekstremiste.

Anne-Florence Débois nga Zyra Federale e Policisë (Fedpol) ka njoftuar për gazetën se Fedpol tashmë ka reaguar në disa dhjetëra raste të ngjashme. “Qoftë me letra paralajmëuese ose kërcënime për  kallëzime penale për Prokurorinë Federale”.

---