Kërkesa për interpretim të dorëheqjes së Haradinajt, dorëzohet në Kushtetuese

Kryeministri në dorëheqje i Kosovës, Ramush Haradinaj, sot ka dorëzuar në Gjykatën Kushtetuese kërkesën për interpretim të aktit të dorëheqjes nga posti i kryeministrit të vendit dhe definimin e kompetencave dhe funksionimit të Qeverisë pas këtij akti.

Lajmin e ka bërë të ditur Haradinaj, përmes një shkrimi në Facebook, përcjell albinfo.ch.

“Qëllimi i kërkesës është, që jo vetëm të kërkohet sqarim për situatën juridike të krijuar pas dorëheqjes sime, dhe me këtë, të shmanget vakuumi institucional, por edhe që ky interpretim nga Gjykata Kushtetuese t’i qartësojë situatat e ngjashme në të ardhmen. Dërgimi i kësaj çështjeje në Gjykatën Kushtetuese është dëshmi e përgjegjësisë institucionale, që Qeveria të veprojë brenda kuadrit kushtetues dhe ligjor, e si pasojë, të mos lejojë vakuum institucional deri në zgjedhjen e Qeverisë së re”, ka shkruar ai.

Haradinaj ka thënë se do ta respektojë cilindo vendimi të gjykatës.

Njëherësh, ai i ka bërë thirrje Presidentit të Kosovës, Parlamentit dhe partive politike që të ndërmarrin veprimet e duhura për shpalljen e zgjedhjeve parlamentare.