Kërkesat ndaj Qeverisë për përbërjen e komisionit për Provimin e Jurisprudencës

Komisioni për Legjislacion dhe Mandate i ka kërkuar Qeverisë së Kosovës që të marrë një vendim të qartë se çfarë do të bëjë me emrat e propozuar për Komisionin e provimit të Jurisprudencës, pasi që tri kërkesat e dërguara nga ministri i Drejtësisë, Abelard Tahiri, proceduralisht nuk janë në rregull.

Kryetarja e Komisionit, Albulena Haxhiu, ka thënë se ministri i Drejtësisë i ka dërguar Komisionit tri letra, ku në të parën ka kërkuar pezullimin e Komisionit dhe në dy tjerat tërheqjen e Komisionit për jurisprudencën. Deputeti Arben Gashi ka thënë se as sekretari i Qeverisë, e as ministri nuk mund ta tërheqin vendimin e organit më të lartë, siç është Qeveria, përcjell albinfo.ch.

Ndërsa, deputeti tjetër, Shkumbin Demaliaj, ka kërkuar që drejtësisë t’i lihen duart e lira për hetime ndaj kryeprokurorit.

Glauk Konjufca nga Vetëvendosje tha se është paradoks që njeriu, i cili dyshohet të mos e ketë fare provimin e jurisprudencës, të jetë përgjegjës për provimin e jurisprudencës.