Kërkohet angazhim për Agjendën e Reformave Evropiane

Kryeministri Ramush Haradinaj, së bashku me ministren e Integrimit Evropian, Dhurata Hoxha, në një konferencë për media ritheksuan edhe një herë vendosmërinë e institucioneve për të kryer të gjitha detyrimet e papërmbushura

“Ministrat duhet të angazhohen që obligimet e papërmbushura për Agjendën e Reformave Evropiane t’i përfundojnë në kohë, duke intensifikuar të gjitha veprimet e nevojshme”, tha kryeministri Ramush Haradinaj në takimin e rregullt të Këshillit Ministror për Integrim Evropian, i dedikuar për zbatimin e Agjendës së Reformave Evropiane, të organizuar nga Ministria e Integrimeve Evropiane, transmeton albinfo.ch.

Haradinaj tha se jemi në prag të vendimeve të rëndësishme, siç është liberalizimi i vizave dhe u rikujtoi detyrat që institucionet përkatëse i kanë nga agjenda evropiane.

“Në këto takime duam të dimë ku jemi me Agjendën e Reformave Evropiane nga Marrëveshja, qëllim më vete janë marrëdhëniet kontraktuale me BE-në, plani i prioriteteve të MSA-së. Është koha e fundit ta kemi raportimin për mënyrën sa më reale të gjendjes”, theksoi ai.

Ministrja e Integrimit Evropian, Dhurata Hoxha, tha se është koha e fundit që të fokusohemi në përmbushjen e obligimeve që dalin nga ERA dhe numëroi të gjitha detyrat që i presin ministritë përkitazi me Agjendën Evropiane.

Pas përfundimit të takimit, kryeministri Ramush Haradinaj, së bashku me ministren e Integrimit Evropian, Dhurata Hoxha, në një konferencë për media ritheksuan edhe një herë vendosmërinë e institucioneve për të kryer të gjitha detyrimet e papërmbushura.