Këshilli Federal dëshiron mbrojtje më të mirë për komunitetin LGBTQIA+

Komuniteti LGBTQIA+ duhet të mbrohet më mirë nga krimet e urrejtjes. Të mërkurën, Këshilli Federal lançoi Planin e Parë Kombëtar të Veprimit kundër krimeve të urrejtjes ndaj personave LGBTQIA+ për vitet 2026-2030, transmeton albinfo.ch.

Në një komunikatë për shtyp, qeveria thekson se dënimi penal i diskriminimit dhe nxiturjes së urrejtjes bazuar në orientimin seksual, deklarimi i thjeshtuar i ndryshimit të gjinisë dhe emrit të parë në regjistrin civil ose në martesë për të gjithë, përbëjnë hapa të rëndësishëm drejt barazisë për personat LGBTQIA+. Megjithatë, ata theksojnë se jeta e përditshme e këtyre individëve mbetet e shënuar nga diskriminimi dhe dhuna.

“Kur sulmon të drejtat e personave queer, sulmon të gjithë personat e margjinalizuar,” thekson Këshilli Federal.

Tre fusha veprimi

Plani i ri synon krijimin e një mjedisi më të sigurt dhe më të respektueshëm për këta individë, duke forcuar mbrojtjen kundër dhunës dhe qëndrimeve armiqësore, dhe duke përmirësuar sigurinë për shoqërinë në tërësi. Ai përmban 12 masa të ndryshme dhe strukturohet në tre fusha veprimi: mbështetje dhe mbrojtje, parandalim dhe monitorim.

Mes masave të propozuara janë organizimi i një dite trajnimi për mbështetjen e viktimave LGBTQIA+ të dhunës, si dhe përditësimi dhe rritja e dukshmërisë së dokumentacionit ekzistues mbi çështjet LGBTQIA+ në sport.

Vlerësimi në 2030

Mbrojtja dhe barazia për personat e prekur duhet të jenë të përhershme në praktikat institucionale dhe shoqërore. Kjo kërkon përmirësim të aksesit në strehimore emergjente dhe shërbime mbështetëse për viktimat e dhunës, masa për parandalimin e dhunës në sport dhe zbatimin kombëtar të një mjeti për raportimin e dhunës dhe krimeve të urrejtjes.

Një vlerësim i planit do të kryhet në vitin 2030, dhe atëherë do të konsiderohet edhe një mundësi për zgjatje të tij.