Kështu duket vinjeta e vitit 2021 në Zvicër

Vinjeta është e vlefshme vetëm për automjetin në të cilin ishte vendosur. Ndalohet çdo heqje dhe riinstalim i saj në të njëjiën automjet ose në një automjet tjetër

Vinjeta e re zvicerane për autostrada, ajo e vitit 2021, do të jetë në dispozicion në pikat e shitjes nga 1 dhjetori i këtij viti (nga e marta që vjen). Ajo ka ngjyrën bazë “metalike të gjelbër”, thuhet në një njoftim të Administratës Federale të Doganave (EZW).

Numri që tregon vitin,  në anën ngjitëse është ngjyrë portokalli, ndërsa ana e përparme është e bardhë. Vinjeta e re kushton 40 franga, aq sa edhe ajo e vjetra.

Vinjeta, e cila është e vlefshme nga 1 dhjetori 2020 deri më 31 janar 2022, mund të merret si zakonisht në stacionet e benzinës dhe garazhet, në sportelet e zyrës postare dhe në zyrat e trafikut rrugor si dhe zyrat doganore, shkruan albinfo.ch.

Drejtuesve të automjeteve u kërkohet të heqin vinjetat e skaduara nga xhami i përparmë për të shmangur pengesat e mundshme të pamjes.

Në mënyrë që vinjeta të jetë e vlefshme, ajo duhet të vendoset drejtpërdrejt në automjet në vendin e caktuar pa përdorimin e materialeve të tjerë: në pjesën e brendshme të xhamit në rastin e makinave, ose në një pjesë automjeti lehtësisht të arritshme dhe të pazëvendësueshme, në rastin e rimorkiove dhe motoçikletave.

Vinjeta është e vlefshme vetëm për automjetin në të cilin ishte vendosur, përcjell albinfo.ch. Ndalohet çdo heqje dhe riinstalim i saj në të njëjiën automjet ose në një automjet tjetër.

 

---