Këtë vit në Durrës pati shumë jahte turistikë

Agjencia e lajmeve shtetërore e Shqipërisë në një shkrim të publikuar për sezonin turistik 2018 thotë se këtë vit vetëm porti i Durrësit ka pritur më shumë jahte se sa të gjitha vitet paraprake nëse i mbledh së bashku.

Numri i jahteve turistike që janë ankoruar në portin më të madh të Shqipërisë që nga fillimi i vitit 2018 tashmë e ka tejkaluar shifrën vjetore të viteve paraprake.

“Jahtet janë ankoruar kryesisht në vendet e Terminalit të Mallrave Gjenerale.Nga të dhënat operative të Sektorit të Statistikave, që nga 1 janari 2018 në kalatat 1, 2, 4 dhe 5 janë ankoruar 296 jahte të përmasave të ndryshme. Ndërsa në vitet e kaluara ishin ndalur 294 jahte gjithsej”, kanë thënë zyrtarët doganor të portit.

Vetëm gjatë periudhës 1-22 gusht 2018 në Durrës kanë qëndruar për periudha deri në një javë 63 jahte me flamurë të vendeve të ndryshme të botës. Turistët dhe drejtuesit e jahteve kanë vizituar qendrat arkeologjike dhe muzeale të qytetit bregdetar.