KFOR-i, thirrje Kosovës e Serbisë që t’i ulin tensionet

Rrëmbimi i 3 policëve, reagon KFOR: Jemi në kontakte me autoritetet serbe dhe të Kosovës, ne nuk ishim në zonë

KFOR këtë të enjte u ka bërë thirrje Kosovës e Serbisë t’i ulin tensionet dhe  të përmbahen nga veprimet e njëanshme që mund të çojnë, siç thotë, “në përshkallëzim të mëtejshëm”.

Ky reagim vjen pas rrëmbimint të tre zyrtarëve të Policisë së Kosovës në veri të Kosovës një ditë më parë.

KFOR-i ka deklaruar sërish se nuk ishte në zonën kur tre policët kosovarë u kidnapuan nga forcat serbe. Po ashtu rrëmbimin e policëve KFOR e cilëson si arrestim.

Misioni i KFOR-it tha se nuk ishte në zonën ku tre policë të Kosovës, siç e ka cilësuar KFOR-i, u arrestuan dje nga forcat policore serbe.

Në një komunikatë për media, KFOR-i tha se ka dërguar një ekip në zonë dhe ka vendosur kontakte me përfaqësuesit e Kosovës dhe Serbisë.

“KFOR-i gjithashtu është në kontakt të rregullt me misionin e udhëhequr nga BE-ja për sundimin e ligjit, EULEX-in. Ne u bëjmë thirrje palëve që t’i ulin menjëherë tensionet dhe të përmbahen nga veprimet e njëanshme, që mund të çojnë në përshkallëzim të mëtejshëm”, thuhet në komunikatë.

KFOR-i tha se po e monitoron situatën dhe po vazhdon të zbatojë mandatin e tij, për të ofruar siguri në tërë territorin e Kosovës. 

---