Kinezët e blejnë aeroportin e Tiranës

TIA, kompania që administron aktualisht aeroportin, zyrtarisht thotë se negociatat vazhdojnë dhe kalojnë në disa faza

Koncesioni i aeroportit të Rinasit i është shitur për rreth 90 milionë dollarë kompanisë kineze “Everbright Global Airport and Investment Fund”, njoftojnë mediat në Tiranë.

Lajmin e bën të ditur “Top Channel”-i, duke iu referuar burimeve jozyrtare, sipas të cilave marrëveshja tashmë është firmosur.

Megjithatë TIA, kompania që administron aktualisht aeroportin, zyrtarisht thotë se negociatat vazhdojnë dhe kalojnë në disa faza.

“Everbright Global Airport and Investment Fund” është pjesë e kompanisë “China Everbright”, e mbështetur nga shteti kinez dhe e specializuar në menaxhim asetesh me një portofol të gjerë investimesh. Kompania ka ngritur një fond të fokusuar në investime në sektorin e aviacionit, porte dhe infrastrukturë në Evropë.