Komuna e Lipjanit, dy vendime të rëndësishme për mërgimtarët

Këto vendime i ka marrë kryetari i Komunës, Imri Ahmeti

Komuna e Lipjanit sot ka marrë dy vendime të rëndësishme që kanë të bëjnë me ardhje e mërgimtarëve, përcjell albinfo.ch.

Me vendim të kryetarit të Komunës së Lipjanit, Imri Ahmeti, nga data 22.07.2019 deri më 31.08.2019 sektori i Gjendjes Civile në Lipjan do të punojë prej orës 08:00 deri më 18:00, nga e hëna deri të premtën, ndërsa në ditën e shtunë nga ora 10:00 deri në 14:00.

Zgjatja e orarit të punës për periodën prej 22.07.2019 deri më 31.08.2019 do të bëhet për shkak të numrit të madh të kërkesave që parashtrohen në këtë sektor që ndërlidhet me fluksin e ardhjes së mërgimtarëve nga shtetet e ndryshme të botës, të cilët kanë të nevojshme rregullimin e dokumenteve.

Komuna e Lipjanit po ashtu ka marrë vendim që të lëshohet parkingun për mërgimtarë, shkruan Indeksonline.

Me propozimin e kryetarit të Komunës së Lipjanit, Imri Ahmeti dhe me vendim të Këshillit të drejtorëve nga nesër do të lejohet të gjithë mërgimtarëve hyrja dhe parkimi i veturave në oborrin e komunës me automjete private që janë me tabela të huaja deri më 31.08.2019.

Komuna e Lipjanit tashmë ka hapësirën e nevojshme për t’i parkuar veturat të gjithë mërgimtarët, të cilët kanë nevojë.

---