Kosova e Shqipëria ulin çmimet e romingut në qershor

Nga data 15 qershor e këtij viti do të fillojë ulja e tarifave të shërbimit roming për qytetarët e Kosovës dhe ata të Shqipërisë, shkruan albinfo.ch.

Kurse heqja e plotë e tarifës mes dy vendeve do të bëhet më 1 korrik të vitit 2021, ka njoftuar Autoriteti Rregullativ i Komunikimeve Elektronike dhe Postare (ARKEP)

 “Në respektim të plotë të marrëveshjes ndërshtetërore, të dy palët u pajtuan që procesi i reduktimit të tarifave të fillojë nga data 15 qershor 2019, fillimisht nëpërmjet aplikimit të modelit “RLAH+”, reduktim i cili do të sjellë efekte pozitive të menjëhershme te qytetarët e të dy vendeve (nga kur do të ketë zvogëlim rreth 90% nga kostoja aktuale e përdorimit të telefonisë në roaming)”, thuhet në njoftimin e ARKEP-it.

Ata po ashtu kanë njoftuar se reduktimi, e më pas heqja e tarifave do të aplikohet sipas principeve të modelit të aplikuar më parë nga vendet e Bashkimit Evropian “Roam Like At Home (RLAH)”, përcjell albinfo.ch.

Mbledhja e përbashkët e Bordit Drejtues të ARKEP-it dhe Këshillit Drejtues të AKEP-it lidhur me këtë proces u mbajt në kuadër të zbatimit të Marrëveshjes për heqjen e çmimeve të shërbimeve roaming për rrjetet publike të komunikimeve të lëvizshme ndërmjet Republikës së Kosovës dhe Republikës së Shqipërisë, të nënshkruar në Pejë më 26 nëntor 2018.