Kosova mbështet integritetin territorial të Ukrainës

Në pesëvjetorin e aneksimit të Krimesë nga Rusia, Kosova mbetet e palëkundur në mbështetjen e saj për integritetin territorial dhe sovranitetin e Ukrainës.

Në një komunikatë për media të Ministrisë së Jashtme të Kosovës thuhet se  vendi ynë, sikurse edhe shtetet e tjera paqedashëse, që janë të përkushtuara për rregullin dhe rendin ndërkombëtar, nuk mund të mbetet e heshtur përballë deklarimeve ruse të aneksimit të këtij territori sovran të Ukrainës, ashtu siç nuk mund të mbetet e heshtur përderisa Rusia vazhdon keqtrajtimin sistematik dhe të padrejtë të tartarëve të Krimesë.

“Kosova shpreh shqetësimin e saj të thellë në lidhje me keqësimin e represionit në Krimenë e okupuar nga Rusia dhe thërret Rusinë që të ndalojë abuzime të tilla dhe të lirojë të gjithë tartarët nga Krimeja dhe shtetasit e tjerë nga Ukraina (rreth shtatëdhjetë), që janë burgosur në mënyrë të gabuar dhe si hakmarrje për mospajtimin e tyre paqësor”, thuhet në komunikatë, shkruan rtk, përcjell albinfo.ch.

Ndryshe, para pesë vjetësh Rusia mori në mënyrë joligjore dhe me forcë Krimenë, duke minuar  parimet ndërkombëtare dhe obligimet e tij, duke përfshirë Kartën e Kombeve të Bashkuara, Aktin Final të Helsinkit të vitit 1975 dhe Marrëveshjet e Parisitit të vitit 1990.