Hapet Ambasada e Kosovës në Portugali

Republika e Kosovës ka bërë hapjen e Ambasadës edhe në një shtet të rëndësishëm në Evropë, i cili është anëtar i NATO-s dhe Bashkimit Evropian,  në Portugali.

Të enjten, me anë të një ceremonie zyrtare nga shteti pritës, u akreditua edhe zyrtarisht ambasadori i parë i Republikës së Kosovës në shtetin portugez, z. Ylber Kryeziu, i cili i dorëzoi letrat kredenciale Presidentit të Republikës portugeze, Marcelo Rebelo de Sousa.

Me këtë rast, ambasadori Kryeziu i përcolli Presidentit të këtij shteti, De Sousa, urimet e Presidentit të Republikës së Kosovës, z. Hashim Thaçi, dhe përkushtimin institucional për thellimin dhe zgjerimin e mëtejmë të marrëdhënieve në mes të dy vendeve dhe dy popujve, përcjell albinfo.ch.

Republika e Kosovës vendosi të hapë për herë të parë ambasadë në shtetin portugez gjatë vitit të kaluar, veprim ky që u mirëprit dhe u vlerësua lart edhe nga autoritetet e shtetit pritës.

Portugalia e kishte njohur Republikën e Kosovës pak muaj pas shpalljes së pavarësisë dhe në vazhdimësi ka ofruar mbështetje për konsolidimin e shtetit të ri dhe integrimin e tij në organizatat ndërkombëtare.