Kosova për herë të parë në Samitin e Investimeve në Azi

Një delegacion i Kosovës nga Ministria e Punëve të Jashtme i udhëhequr nga Drejtori i Komunikimit dhe Diplomacisë Publike, Sami Kastrati, kanë përfaqësuar vendin për herë të parë në Samitin e Investimeve, i cili u mbajt në Kuala Lumpur të Malajzisë.

Samiti një ditor, me pjesëmarrje të kompanive të shumta nga shtete të ndryshme të Azisë në përgjithësi dhe Azisë Jug-lindore në veçanti, duke përfshirë Korin Diplomatik të akredituar në shtetin e Malajzisë, prezantoi disa shtete të ndryshme të botës, të cilat vlerësohen me potenciale të mëdha zhvillimi, ndërsa nga kontinenti i Evropës, Kosova ishte vendi i vetëm pjesëmarrës.

Kosova u prezantua si vendi i parë në Samit nga shtetet tjera pjesëmarrëse.

“Fakti, që ne jemi këtu është dëshmia më e mirë se vendi ynë i kushton një rëndësi të veçantë Investimeve të Huaja Direkte – IHD-ve.Ne, jemi këtu për të prezantuar mundësitë e bizneseve, që ofron vendi ynë, t’ju asistojmë juve në këtë drejtim, t’i përcjellim ftesën e sinqertë për investime dhe të tregojmë përcaktimin dhe përkushtimin tonë të fuqishëm se Kosova është gati për Ju”, ka thënë Kastrati.

Nw njoftim thuhet se pas prezantimit të Kosovës dhjetëra biznese dhe fondacione kanë takuar delegacionin e Kosovës, duke shprehur interesimin për investime konkrete nga energjia e ripërtëritshme si ajo solare dhe me erë, në tekstil, telekomunikacion, atë bankar dhe sektorë të tjerë.