Kosova, pjesë e panairit prestigjioz të turizmit në Londër

Kompania kosovare “Balkan Natural Adventure” është pjesë e panairit prestigjioz të turizmit të përkrahur nga e përditshmja londineze “The Times”, “Destinations”, nga data 31 janar deri më 3 shkurt.

Panairi “Destinations” mbledh disa nga kompanitë më prestigjioze të udhëtimit në botë dhe mbahet në Manchester dhe në Londër. “Balkan Natural Adventure” është kompania e vetme nga Kosova dhe atje paraqitet me top produktet e veta te ecjes në Bjeshkët e Nemuna dhe ato të Sharrit, përcjell albinfo.ch.

Paraqitja e kompanisë është organizuar nga vetë stafi, i cili ka përgatitur materialet dhe ka siguruar hapësirën e prezantimit, duke e bërë kështu “BN Adventure” kompaninë e parë kosovare të turizmit që paraqitet si e vetme në një panair prestigjioz si “Destinations”.

Në kuadër të organizmit Ambasada e Kosovës në Londër ka ndihmuar me logjistikë dhe materiale shtesë për një paraqitje më të denjë të kompanisë dhe vetë Kosovës.

“Për ne është shumë e rëndësishme që të paraqitemi para publikut londonez, ata përbëjnë pjesën më të madhe të mysafirëve tonë dhe shpresojmë se ky panair do të rrisë numrin e truristëve britanikë në Kosovë”, ka thënë Nol Krasniqi, pronar i kompanisë.