Kosova po tërheq gjithnjë e më shumë punëtorë të huaj

Shumica e imigrantëve vijnë nga vendet e rajonit, përfshirë Turqinë, Shqipërinë, Serbinë dhe Maqedoninë e Veriut. Megjithatë, një pjesë e konsiderueshme e fuqisë së huaj punëtore po vjen edhe nga vende aziatike, përfshirë Bangladeshin dhe Filipinet.

Numri i shtetasve të huaj që vijnë në Kosovë për të punuar po shënon rritje të vazhdueshme. Vetëm gjatë gjashtë muajve të parë të vitit 2026 janë lëshuar 6,174 lejeqëndrime për të huajt, prej të cilave 3,271, apo 53 për qind, për qëllime punësimi, shkruajnë mediat në Prishtinë, përcjell albinfo.ch.

Këto të dhëna janë përfshirë në draftin e Strategjisë së Migracionit 2026-2030, të finalizuar këtë javë nga Ministria e Punëve të Brendshme.

Sipas dokumentit, imigrimi për arsye punësimi është rritur ndjeshëm gjatë viteve të fundit. Në vitin 2021, numri i lejeqëndrimeve për punësim ishte 2,122, ndërsa në vitin 2025 arriti në 5,087, duke u më shumë se dyfishuar.

“Lejeqëndrimet për arsye punësimi përbënin rreth 56% të të gjitha lejeve të lëshuara në vitin 2025, duke treguar se tregu i punës është një nga motivet kryesore të imigrimit. Ndërkohë, trendi i rritjes së kërkesave vazhdon edhe në vitin 2026”, thuhet në draft-strategji.

Rritja e pranisë së punëtorëve të huaj po vërehet edhe te bizneset në Kosovë. Sipas të dhënave të përfshira në dokument, rreth 18 për qind e bizneseve tashmë kanë të punësuar shtetas të huaj, kryesisht në grupe prej një deri në dhjetë punëtorësh.

Ndërkohë, 34 për qind e bizneseve planifikojnë të rekrutojnë punëtorë të huaj në të ardhmen.

Në Strategjinë e Migracionit vlerësohet se imigrimi për qëllime punësimi po shndërrohet në një komponent të rëndësishëm të tregut të punës në Kosovë.

“Trendet aktuale tregojnë se ky do të jetë një zhvillim i vazhdueshëm, duke kërkuar politika dhe mekanizma të qartë për të menaxhuar flukset migratore dhe për të siguruar integrimin e qëndrueshëm të punëtorëve të huaj”, theksohet në dokument.

Nga cilat vende vijnë punëtorët?

Profili i të huajve që vijnë për të punuar në Kosovë përbëhet kryesisht nga të rinj dhe meshkuj. Sa i përket nivelit të arsimimit, shumica kanë të përfunduar arsimin fillor ose të mesëm.

Vetëm rreth 10 për qind kanë diplomë universitare, ndërsa 5 për qind kanë përfunduar studimet master.

Shumica e imigrantëve vijnë nga vendet e rajonit, përfshirë Turqinë, Shqipërinë, Serbinë dhe Maqedoninë e Veriut. Megjithatë, një pjesë e konsiderueshme e fuqisë së huaj punëtore po vjen edhe nga vende aziatike, përfshirë Bangladeshin dhe Filipinet.

Sipas draft-strategjisë, ky profil i punëtorëve të huaj mund të ketë rëndësi për ekonominë e Kosovës, veçanërisht për sektorët që po përballen me nevojë për fuqi punëtore.

Dokumenti trajton gjithashtu migrimin e parregullt, i cili aktualisht vlerësohet si i menaxhueshëm. Kosova përballet me këtë fenomen si vend origjine i qytetarëve që mund të kenë qëndrim të parregullt në BE dhe zonën Schengen, por edhe si territor tranziti për shtetasit e vendeve të treta që lëvizin përgjatë rrugëve migratore të Ballkanit Perëndimor.

---