Kosovari dhe serbi kontrabandojnë 31850 boksa cigaresh

Një shtetas i Kosovës dhe një i Serbisë kanë marrë dënime 18 respektivisht 12 muaj burg dhe gjobë në të holla secili nga një milion euro. Këtë dënim e ka shqiptuar një gjykatë e Lincit, Austri për dy personat e gjetur fajtorë për tregtinë “në stil të lartë” me cigare. Ata kanë kontrabanduar nga Kosova në Austri dhe i kanë shitur plot 31.850 shtanga (boksa) cigaresh.

Autoritetet  doganore në qarkun Gmunden i kanë kapur ata në vepër, me rastin e dorëzimit në destinim të 1150 boksave, me ç`rast kanë konfiskuar edhe 20.400 euro. Malli, me një autobus që kishte ardhur nga Kosova, i ishte sjellë shtetasit serb që jetonte në këtë regjion. Aktualisht po zhvillohen hetime edhe kundër 60 personave që dyshohet se kanë bërë pranimin e sasive të cigareve të kontranbanduara.

Kontrollimi i bërë në banesën e serbit ka treguar se gjatë tri viteve në Austri janë shitur 31.850 boksa cigaresh të kontrabanduara, ose gjithsej 6.37 milionë copë cigare. Kjo tregti  ilegale e ka dëmtuar shtetin austriak për 1.28 milionë euro tatime të papaguara.