Kosovë: Nesër Kuvendi diskuton propozimin për rritjen e koeficientit të pagave

Me ftesë të partisë opozitare, AAK-së, nesër deputetët e Kuvendit të Kosovës do të debatojnë në lidhje me nevojën për ngritjen e koeficientit të pagave.

Kështu ka bërë të ditur shefi i Grupit Parlamentar të AAK-së, Besnik Tahiri.

Ai ka thënë se është momenti i fundit që të gjithë deputetët të mbështesin rezolutën për rritjen e pagave.

“Është momenti i fundit që gjithë deputetët, pozitë e opozitë, me votën e tyre t’i japin mbështetje rezolutës së Aleancës për rritjen e pagave! Varfëria ka emër dhe adresë. Nga muaji në muaj qytetarët tanë po shohin se si artikujve bazikë iu luajnë çmimet për 10%, 20% apo 50%. Për jetën e qytetarëve tanë, kjo nënkupton ulje e menjëhershme e konsumit dhe e standardit të tyre jetësor. Për shumicën kjo gjeneron presion maksimal”, ka thënë Tahiri, përcjell albinfo.ch.

Ai ka shtuar se në seancën e nesërme do të kërkohet që të ndahet buxhet për rritje të koeficientit në minimum 129 euro.

“Kjo është thyerje dhe zhgënjim. Janë shumë familje që nuk arrijnë as të mbyllin muajin. Të tjerët detyrohen t’i kufizojnë shërbimet për fëmijët e tyre. Të moshuarit varen edhe më shumë nga përkrahja familjare e sociale. Prindërit nuk ia arrijnë t’ia dalin dhe as ta balancojnë nevojën për më shumë angazhim për pak më shumë të hyra, me nevojën për më shumë përkushtim ndaj jetës familjare. Të rinjtë ikin duke mos parë perspektivë zhvillimi dhe standardi për ta”, theksoi Tahiri. Ai shtoi se do të propozojnë që të ndahet buxhet për rritje të koeficientit në minimum 129 euro.