Kosovë: Paralajmërohet padi ndaj ZRRE-së pas vendimit për shtrenjtimin e rrymës

KESCO

Vendimi i Zyrës së Rregullatorit për Energji (ZRRE) për rritjen e çmimit të energjisë elektrike për 16.1% nga 1 maji ka nxitur reagime të qytetarëve dhe aktivistëve, të cilët po përgatiten të ndjekin rrugë ligjore kundër këtij vendimi.

Gjatë një proteste të premten, ata paralajmëruan ngritjen e padisë ndaj ZRRE-së, ndërsa për këtë kanë angazhuar avokatin Ardian Bajraktari. Ky i fundit konfirmoi për KOHËN se është në pritje të publikimit të vendimit të plotë për të dorëzuar padinë brenda afateve ligjore.

Bajraktari ka theksuar se procesi që ka çuar në këtë vendim është përcjellë me shkelje ligjore, përfshirë mungesën e konsultimit publik brenda afatit të përcaktuar me ligj, transmeton albinfo.ch.

Nëse Gjykata aprovon padinë, juristët Bajraktari dhe Anton Nrecaj vlerësojnë se vendimi për shtrenjtimin e rrymës mund të rrëzohet dhe procesi të nisë nga e para.

Ndërkohë, njohësi i sektorit të energjisë, Adhurim Haxhimusa, ka paralajmëruar për një cikël të vazhdueshëm të shtrenjtimit të energjisë elektrike në Kosovë, duke kujtuar se kjo është rritja e tretë në katër vitet e fundit, transmeton albinfo.ch.