Kosovë, partitë politike pa demokraci të brendshme

Sipas konceptit demokratik, partitë politike në Kosovë funksionojnë me logjikën e liderëve meritokrat, ndërsa demokracia e brendshme figuron vetëm në letër

Subjektet politike kosovare vazhdojnë ta ngufasin demokracinë e brendshme, duke i mbytur zërat që mendojnë ndryshe. Sipas konceptit demokratik, partitë politike në Kosovë funksionojnë me logjikën e liderëve meritokrat, ndërsa demokracia e brendshme figuron vetëm në letër. Kështu të paktën vlerësojnë analistët politikë.

Driton Selmanaj, analist politik, thotë se partive politike në Kosovë, u mungon në thelb demokracia e brendshme.

“Demokracia nuk ekziston te këto subjekte politike. Nuk nënkuptohet demokraci vetëm për të thënë se organizuam një takim, forma se si merren vendimet, roli i grave, roli i të rinjve brenda strukturave politike. Cili është roli i tyre në proceset vendimmarrëse, cili është roli i liderit politik? Ai është absolut”, shprehet Selmanaj, citon REL.

Në Kosovë, sipas tij, ka parti lideriste dhe më së paku mund të flitet për parti në kontestin e demokracisë së brendshme.

Edhe Petrit Zogaj, analist dhe drejtor ekzekutiv i organizatës “Fol”, thotë se partitë politike luajnë një rol qenësor në zhvillimin e demokracisë, por përvojat kanë treguar se në Kosovë partitë pothuajse më shumë ekzistojnë për të përfituar, se sa për të punuar për të mirën e përgjithshme.

“Formalisht, kemi parti, të cilat kanë proceduara, mirëpo jo formalisht kemi grupe brenda partive, të cilat i menaxhojnë këto parti politike. Madje, kemi parti, të cilat kanë edhe këtë mbiemrin demokratike, lidhje demokratike, mirëpo funksionimi i tyre i brendshëm çalon shumë”, konsideron Zogaj.

Analisti Selmanaj thekson se liderët politikë, me veprimet e tyre, me demokracinë e tyre, i kanë sjellë Kosovës kriza të njëpasnjëshme politike dhe, siç thotë ai, gjendjen, në të cilën ndodhet Kosova në aspektin politik është për keqardhje.

“Ne kontestin e zhvillimit të brendshëm politik dhe demokratik të institucioneve, në funksion të përmirësimit të jetës së qytetarëve që jetojnë këtu, atëherë duket se kjo klasë politike me këtë mendësi politike, nuk mund të shkojë më tutje. Përfundimisht duhet qasje tjetër”, vlerëson Selmanaj.

Ndërkaq, sipas Zogajt, Kosovës i nevojitet që të ketë parti politike me demokraci të brendshme, ashtu që interesi i qytetarëve të jetë në agjendat e tyre.

“E kemi parë në seancën e fundit të Kuvendit të Kosovës, ku në votimin e parë për president, ne kemi parë që vetëm 50 vota kanë qenë në favor të kandidatit për president që ishte zoti Thaçi, pastaj shkoi duke u ndryshuar vullneti politik i 21 deputetëve të Kuvendit ë Kosovës”, deklaroi ai.