Kosovë, vaksinat e para antiCOVID arrijnë në shkurt

Keystone EPA/PIERO CRUCIATTI / POOL

Pas shfaqjes së rasteve me infektimin Covid, në mbarë botën shumë kompani farmaceutike filluan të merren me krijimin e një vaksine për ta luftuar këtë virus.
Tashmë janë aprovuar vaksinat e prodhuara nga kompanitë farmaceutike Moderna, Pfizer e BioNtech, të cilat tashmë shumë shtete kanë filluar të sigurojnë dozat për qytetarët e tyre.

Sipas Ministrisë së Shëndetësisë, një gjë të tillë është duke e bërë edhe Kosova. Ministri në detyrë i Shëndetësisë, Armend Zemaj, në fillim të janarit bëri të ditur se kanë siguruar 500 mijë doza të vaksinës antiCOVID nga Pfizer.

Krahas kësaj Ministria e Shëndetësisë bëri të ditur se përveç vaksinave Pfizer, Kosova do të marrë edhe 600 mijë vaksina të tjera të siguruara përmes shtetit të Austrisë, kurse 720 mijë doza të tjera do të merren falas nga mekanizimi COVAX.

Po ashtu u tha se vaksinat e para kundër COVID-19 do të arrijnë në Kosovë në muajin shkurt, për të filluar me vaksinimin e grupeve prioritare dhe mundësia për vaksinim do t’u jepet të gjithë qytetarëve, sipas Planit të imunizimit për COVID-19, të hartuar nga Instituti Kombëtar i Shëndetësisë Publike.

Dozat e para të vaksinës kundër Koronavirusit pritet të arrijnë në shkurt, mirëpo nuk është bërë e ditur data. /Albinfo.ch