Kosovë: Vdes një person nga ethet hemorragjike Krime Kongo

Një person 44-vjeçar nga komuna e Malishevës ka ndërruar jetë si pasojë e infektimit me virusin e etheve hemorragjike Krime Kongo (EHKK).

Rasti është konfirmuar nga drejtori i SHSKUK-së, Basri Sejdiu, ka njoftuar Komuna e Malishevës, shkruan albinfo.ch.

Bazuar në të dhënat e deritanishme, tashmë i ndjeri, edhe pse i prekur me EHKK, nuk është trajtuar në Klinikën Infektive, por në një klinikë tjetër dhe në momentet e fundit të jetës, ka pasur nevojë edhe për terapi me oksigjen.

Lidhur me rastin sot është mbajtur një takim urgjent i shtabit komunal për EHKK, si dhe çështja është trajtuar edhe në mbledhjen e rregullt të Këshillit të Drejtorëve.

Ndërsa IKSHP ka bërë me dije se për periudhën 01.02.2019-05.07.2020, janë raportuar gjithsej 2080 raste të pickimeve nga rriqrat në Kosovë. Numri më i madh i pickimeve është raportuar nga komuna e Malishevës, 837 raste, Suhareka 376 raste, Klina 187 raste, Rahoveci 118 raste dhe komunat e tjera me numër më të vogël të rasteve.

Për gjashtë vjet me radhë në komunën e Malishevës, nuk ka pasur raste të vdekjeve me EHKK, ndërsa për pesë vjet radhazi nuk ka pasur as raste të infeksionit.