Kosovë: Zjarr i madh përfshin një fabrikë në Gjakovë

Një zjarr i përmasave të mëdha ka përfshirë një fabrikë në qytetin e Gjakovës, duke shkaktuar panik dhe dëme të konsiderueshme materiale.

Pamjet e shpërndara në rrjetet sociale tregojnë se flakët kanë kapluar tërë objektin, ndërsa sasi të mëdha tymi janë ngritur mbi zonë dhe kanë mbuluar qiellin.

Zëdhënësi i Policisë së Kosovës për rajonin e Gjakovës, Shermet Elezaj, ka bërë të ditur se rreth orës 16:40 autoritetet janë njoftuar për shpërthimin e zjarrit në një fabrikë që ndodhet në rrugën “Gjergj Sokoli”.

Sipas tij, njësitë policore dhe ekipet e zjarrfikësve kanë dalë menjëherë në vendin e ngjarjes dhe po ndërmarrin veprime intensive për lokalizimin dhe shuarjen e flakëve.

“Zjarri është i përmasave të mëdha dhe ekipet emergjente janë ende në terren për ta vënë situatën nën kontroll. Deri tani nuk ka informacione për persona të lënduar, ndërsa vlerësimi i plotë i dëmeve dhe rrethanave do të bëhet pas shuarjes së plotë të zjarrit”, ka deklaruar Elezaj.