KQZ, ende pa vendim për votat e diasporës të ardhura me vonesë

Ende nuk ka marrë asnjë vendim Komisioni Qendror Zgjedhor lidhur me mbi 4 mijë vota të mërgatës të ardhura përmes postës pas afatit ligjor.

Po ashtu një vendim të tillë nuk ka marrë as për mbi 3 mijë vota të ardhura nga Serbia që janë dorëzuar fizikisht dhe jo përmes postës.

Besnik Buzhala nga divizioni i Shërbimit të Votuesve në raportimin e tij është shprehur se janë mbi 3 mijë zarfe nga Serbia që janë dërguar fizikisht në postë.

“Me postë kanë ardhur 15 mijë e 795, mbi 3 mijë zarfe nga Serbia, këto zarfe janë dërguar fizikisht në postë. Mbi 4 mijë zarfe kanë arritur pas afatit, gjatë verifikimit kemi vërejtur se janë futur në posta ndërkombëtare dhe mbajnë datat 19, 20”, ka thënë ai.

Nga ana tjetër, anëtari i LVV-së në KQZ, Adnan Rrustemi, ka kërkuar që zarfet e diasporës të procedohen si të rregullta.

“4 mijë e 500 zarfeve nga mërgata që janë pranuar pas afatit. Këta duhet të miratohen si të rregullta në kuptimin e pranimit të tyre. Nuk ka asnjë pengesë që këto të procesohen si të rregullta”, është shprehur  ai.

Gjithashtu edhe anëtari i LDK-së në KQZ, Sami Hamiti, tha se duhet të respektohet ligji në rastin e këtyre votave.

“Në bazë të ligjit, të dyja janë të jashtëligjshme. Ligji e parasheh 24 orë para votimit duhet të jenë ato vota. Votat nga Serbia totalisht jashtëligjshëm kanë ardhur në Kosovë, ligji e përcakton që duhet me postë. Njësia duhet ta zbatojë ligjin. Janë afate dhe është ligji. Votat që vijnë duhet ta kenë vulën e shtetit nga kanë ardhur. Ato vota po shihen që janë të fabrikuara”, tha ai.

Ndërsa Valdete Daka, kryetare e KQZ-së, tha se në të dyja rastet pret që të respektohet ligji.

“Unë pres nga njësia që të zbatohet ligji”, tha ajo, përcjell albinfo.ch.