KQZ pranon dorëheqjet e katër zyrtarëve të komisioneve zgjedhore në veri

Komisioni Qendror i Zgjedhjeve ka pranuar njoftimin për dorëheqje të 4 zyrtarëve komunalë të zgjedhjeve në komunat: Mitrovicë e Veriut, Zveçan, Zubin Potok dhe Leposaviq.

Sot, Komisioni Qendror Zgjedhor e ka pranuar njoftimin për dorëheqje të katër zyrtarëve komunalë të zgjedhjeve në katër komunat veriore.

Lajmin e ka konfirmuar zëdhënësi i KQZ-së, Valmir Elezi.

“Komisioni Qendror i Zgjedhjeve ka pranuar njoftimin për dorëheqje të 4 zyrtarëve komunalë të zgjedhjeve në komunat: Mitrovicë e Veriut, Zveçan, Zubin Potok dhe Leposaviq. KQZ-ja do ta trajtojë këtë çështje dhe do t’iu mbajmë të informuar”, tha Elezi.

Kujtojmë që pas vendimit të Qeverisë së Kosovës për targat, serbët kanë vendosur të largohen nga institucionet e Kosovës. Deri më tash, ata kanë dhënë dorëheqje nga postet e tyre në qeveri, kuvend, komunat ku udhëheqin, Policinë e Kosovës, prokurori e gjykata.

---