Shqiptarëve në Mal të Zi u bëhet thirrje të votojnë për Listën Shqiptare

Keystone

Këtë të diel në Mal të Zi mbahen zgjedhjet parlamentare, ndërsa shqiptarët garojnë në një listë të përbashkët. Krerët institucionalë e politikë në Kosovë e Shqipëri u kanë bërë thirrje shqiptarëve që të dalin sa më masivisht në zgjedhje dhe ta votojnë Listën Shqiptare.

Presidenti i Kosovës Hashim Thaçi ka thënë se komuniteti shqiptar në Mal të Zi ka qenë gjithmonë faktor stabiliteti dhe ka luajtur rol konstruktiv e kontributdhënës në rrugën e integrimit euroatlantik të tij. Ai u ka bërë thirrje atyre që të dalin masivisht në zgjedhje për ta mbështetur Listën Shqiptare, në mënyrë që ta avancojnë përfaqësimin e tyre politik dhe ta sigurojnë ecjen përpara të Malit të Zi drejt së ardhmes euroatlantike, si pjesë e NATO-s dhe Bashkimit Evropian.

Edhe kryeparlamentarja Vjosa Osmani u ka bërë thirrje shqiptarëve të Malit të Zi për pjesëmarrje masive në zgjedhjet që do të mbahet nesër në këtë vend. Osmani ka thënë se shqiptarët me votën e tyre do të forcojnë më tej praninë e tyre në jetën publike të Malit të Zi.

Zgjedhjet në Malin e Zi i ka vlerësuar si shumë të rëndësishme Lëvizja Vetëvendosje, cila ka ftuar shqiptarët të votojnë dhe të kontribuojnë në rritjen e numrit të përfaqësuesve shqiptarë nëpër institucione shtetërore të Malit të Zi.

Ndërsa kreu i PDK-së, Kadri Veseli ka thënë se forcimi i zëri të shqiptarëve në institucionet shtetërore të Malit të Zi, është në dobi edhe të vetë këtij shteti fqinj, sepse shqiptarët kudo ku jetojnë e mbajnë të palëkundur orientimin euro-atlantik dhe mbështesin pa kursim forcimin e liberal-demokracisë dhe bashkëjetesës në diversitet.

E kryeministri i Shqipërisë, Edi Rama, përmes një videomesazhi në Facebook, u ka bërë thirrje bashkëkombasve në Malin e Zi që të votojnë për Listën Shqiptare dhe ta forcojnë partneritetin strategjik me presidentin Milo Gjukanoviç dhe partinë e tij, përcjell Albinfo.ch.