Kryeprokurori tregon arsyet e vdekjes së dy policëve

Kryeprokurori i Prokurorisë Themelore në Ferizaj, Shukri Jashari, në një prononcim për KTV-në, pas gjetjes së trupit të pajetë që dyshohet të jetë i policit të vdekur pas aksidentit në lumin Lepenc, Armend Trena, ka thënë se sipas hetimeve të deritashme, gjithçka çon në dyshimin se ka qenë aksident komunikacioni.

“Është konstatuar se automjeti në momentin e aksidentit ka qenë në gjendje të rregullt. Por ende s’e dimë se si ka ardhur deri tek dalja nga rruga e automjetit”, ka thënë Jashari, përcjell albinfo.ch.

Kreu i Institutit të Mjekësisë Ligjore, Arsim Gërxhaliu, tha se nesër pritet që trupi i Armend Trenës t’i dorëzohet familjes për ceremoninë e funeralit.

Ai tregoi edhe shkaktarin e vdekjes së dy policëve. “Lëndime të shumta, tipike aksidentale, gjatë kohës së rrotullimit dhe rënies poshtë”, tha Gërxhaliu.