Kthehet dimri në Zvicër: Aksident zinxhiror në rrugën e rrëshqitshme

Dhjetë automobila janë përfshirë në ndeshje, bën të ditur Policia Kantonale e St. Gallenit. Por në këtë aksident nuk ka pasur të lënduar.

Edhe pse tashmë një muaj jemi në stinën e pranverës, dimri i ka bërë edhe një vizitë, shpresojmë të shkurtë, Zvicrës. Temperaturat sot në Zvicrën lindore kanë rënë në rreth 4 gradë dhe ky mot i ftohtë është shoqëruar me shi dhe vende vende edhe me borë.

Kjo gjendje ka shkaktuar edhe aksidente trafiku. Kështu, sot në mëngjes, në autostradën  A1 në drejtim të qytetit St.Margrethen, (Kantoni St. Gallen), për shkak të rrugës së rrëshqitshme ka ndodhur një aksident zinxhiror, njofton srf.ch.

Dhjetë automobila janë përfshirë në ndeshje, bën të ditur Policia Kantonale e St. Gallenit, përcjell albinfo.ch. Por në këtë aksident nuk ka pasur të lënduar.

Ky aksident ka shkaktuar një kolonë të gjatë në mes të lokaliteteve Meggenhus dhe Rheineck. Automjeteve u është dashur të prisnin deri një orë në kolonë.

(Foto: Kapo, St. Gallen)