Kundër diskriminimit të të sëmurëve nga kanceri

"Krebsliga" reagon ndaj rasteve në shtim të refuzimit që disa sigurime po i bëjnë pagesës së medikamenteve, pjesë e trajtimeve të dëshmuara të kancerit

(AP Photo/Eckehard Schulz)

Liga zvicerane e kancerit (Krebsliga) ka hapur një zyrë të re të këshilltarit. Aty pacientët, sigurimi shëndetësor i të cilëve nuk pranon t`ua paguajë medikamentet e shtrenjta kundër kancerit, mund të këshillohen falas. Kjo zyrë do të fillojë funksionimin nga muaji qershor, bën të ditur Krebsliga për Radio SRF.

Kjo zyrë është hapur si reaksion ndaj rasteve në shtim të refuzimit që disa sigurime po i bëjnë pagesës së disa medikamenteve qe madje janë pjesë e trajtimeve  të dëshmuara të kancerit. Këtë dukuri që është rritur sidomos prej një viti e gjysmë, e ka konfirmuar shoqata e mjekëve zviceranë që trajtojnë të sëmurët nga kjo sëmundje (onkologët).

Zyra Federale e Shëndetësisë duke filluar nga muaji maj do të mbledhë të dhënat lidhur me këtë situatë. Mbi këtë bazë pastaj ajo do të shqyrtojë dhe verifikojë përmes fakteve, konstatimin e përmendur nga mjekët e kancerit.