Kuqezinjtë i vazhdojnë përgatitjet intensive

Ndeshja Ukrainë – Shqipëri do të luhet të shtunën, më 7 shtator, në orën 20:45, në stadiumin “Epet Arena” të Çekisë

Kombëtarja shqiptare ka vijuar me përgatitjet për dy ndeshjet e para në UEFA Nations League ndaj Ukrainës dhe Gjeorgjisë. Kuqezinjtë zhvilluan seancën e dytë stërvitore këtë të martë në “Shtëpinë e Futbollit”.

Departamenti i Komunikimit në FSHF bën me dije se këtë pasdite trajneri Silvinjo ka pasur në dispozicion edhe Myrto Uzunin, Mario Mitajn, Jasir Asanin dhe Adrian Bajramin, ndërsa Enea Mihaj mbërriti pasditen e sotme në Tiranë dhe u la pushim nga stafi teknik, transmeton albinfo.ch.

Stërvitja e sotme nisi me punën në palestër e më pas trajneri Silvinjo së bashku me ekipin provuan disa situata të ndryshme loje dhe ana taktike.

Edhe në këtë seancë stërvitore me skuadrën u bashkuan disa lojtarë nga Kombëtarja U-21, Feta Fetai, Marcelino Preka, Adrion Pajaziti dhe Stiven Shpendi.

Ndeshja Ukrainë – Shqipëri do të luhet të shtunën më 7 shtator, në orën 20:45, në stadiumin “Epet Arena” të Çekisë.

 

---